Acts 28
Paulo Ena Mi'una no La'olu ne Maluta
1Ioxe no mine nexi teuatu no ale mukalusi, la nexi temauli la texalisou la'olu ne ualasou lexe Maluta. 2 aIa ta moosou tuala no la'olu ne mimaisixe, la mi'oxonu 'ilixo lailaixe manina noxixe, sou mi'osasixe mo mitauxusixe navu. Xo nexi sivevexe kalumo no anu la'iua mo tani lelemesou. 3Xe Paulo muavuti la molu mumolo siala se'i sou mune'e mu'italonu no navu. Ia no mine Paulo muatonu ovu loxo ne, la ulavu uasi ne sinana veveeni masua vile a muxolu no nano no ovu ne. Ia anu mune'e mu'talonu ovu ne no navu, xe sinana veveeni masua muxamulinu navu ialuxu, la mupisikei muatu la mungasou Paulo avolu. 4No mine ta moosou tuala no la'olu ne mimaisou sinana veveeni masua mu'alateinu Paulo avolu la mulili mulu'e. Ane'i mimaisou aloxo ne, la ane'i mivikalane'i ngatongato'o lexe, “Itema ane 'o ne, mane anu itema masua sou uve'a ta mitema isoli. La sou anu usoli no anu voxo masua e muxalisou no luaki 'o uasi, ia vaimomo 'o lataua sou ukoli ulivu umasaxa lexe anu umauli la uasi.” 5 bIa Paulo muavuti la musupeinu sinana veveenu masua ne mulai mu'una no navu ia tu'umaxu vile mo pipiena vile uxali noxou Paulo uasi. 6 cIa ta moosou tuala no la'olu ne mimaisou la itulu io imolo tane'i sou iutitiiou lexe avolu usoxo mo ulapau usoli palea. Ia mimalei ta veveeni la Paulo avolu usoxo mo ulapau mo usoli uasi, la sou ane'i mixavutala lexe, “Itema ane 'o, anu itema uasi male anu lataua vile ane.”7Alai no lia ane mixolu no anu ne lialiaxu tila noxi'a ta mitema sou tuala ane ne e ualasou lexe Papulio. Anu mu'osasixe mo mulailinexe no taasou. La texolu voxo tatalu sou musaxilaixe laixe manina. 8Ia momu ne mupipiena tatila manina. Mo anu a vasimolu ialuxu xe nixinixi mu'oki noxou mo anu a muai. Ia Paulo mulomusou la mulai noxou sou mulingasou xe mumulaxu avolu vaxa noxou sou mupamaulinu. 9Xe ta mitema sou tuala no la'olu ane ne mimaisou aloxo ne, la mine'ene'i ta mitema e mipipiena ne noxou sou mupamauline'i kalumo. 10Ane'i mitaxanexi laixe manina. Xe no mine nexi sou talutu, la miitimexi mimii ta piena manina sou misu'ulinexi.
Paulo Muxali ne Romu
11Ili'i no 'a so'io tatalu e nexi texolu no la'olu ne la nexi tetelo no lasipi. Lasipi mutulu no la'olu ne no anu voxo sou sivo tatila. Anu lasipi sou tuala tila ne Alekisandolia. Ia no kusinou u'uli ne kaukavune'i lataua kalavoi e ualasou lexe Seusu ta 'olu tamei. 12Tetelo no anu la sou telai texali no tuala vile e ualasou lexe Silakiusu la texolu lai ne voxo tatalu. 13Xe telutu lai ne la telai texali no tuala tila ne Lexiumu. Xe ili'i no voxo vile la, la sivo muto'o la mune'e mutavulenexi xe voxo vile ili'i, la nexi texali ne Puteoli. 14Texali lai ne la nexi texalisi'a ta vivixe mose'i la mi'avalixe sou lexe noxi'a taxolu la sou texolu voxo muxatele tamei mukalu la sou nexi tene'e ne Romu. 15No mine ta mitema mimulaxu tane'i noxou Iesu mixolu ne Romu ne milomusixe, la ane'i mialanexe sou mine'e mixalisixe no vote'i. Noxi'a texalisixe ngato'o no mataona vile e milemolu lexe Apiusu e tani sou isova la'ilali no anu xe mataona vile la milemo lexe tani tatalu sou ta mitema iai no anu. Xe Paulo mumaisi'a la mulemo laixe musuku mulai noxou Lataua mo muno'u xavi manina.16No mine nexi texali ne Romu, la ane'i mipalamatananu Paulo sou ilou itema sou 'oto'oto vile ane'isisi ixolu no tani vile sou anu usaxila'u.
Paulo Mua'aloxu A'alo Laixe Noxou Iesu ne Romu
17Mixali mixolu voxo tatalu mukalu, xe ili'i, la Paulo mu'avali'a ta tatila noxi'a ta Iutaia, xe ane'i mine'e mipita mukalu, la Paulo muvikalane'i aloxo 'o, “Ta vivilo, eni a'oxo susu noxi'a ta mitemamenge uasi mo mipoloxalonu 'ili'ilixo noxi'a ta xaixasinge uasi, ia ane'i mitetelisilo ne Ielusalemu, mukalu la mi'italoleli elai noxi'a ta Romu. 18 dAne'i ta mitema ta Romu mitali'itali'isilo la sou mimasaxa lexe milulusilo 'o xo eni a'oxonu susu vile masua sou asoli no anu uasi. 19 eIa no mine ta Iutaia mixilili mu'oki no anu vaikala ane noxi'a ta Romu la sou eni elinga lexe atelai noxou Kaisari sou molu ulomusou vaikala noxilo. Ia loxo eni atulusi'a ta mitema noxilo no anu vaikala sou mivile uasi. 20 fTava'u aloxo ne, la sou eni emasaxainge sou lexe amaisinge mo avivikala sevile noxinge. Xo loxo eni emuxaxu taleli no anu mii ma'ia ane nenge ta Isilaeli taxoxomaiou la sou ane'i misakileli no anu seni vaimomo 'o anu anesi.”21Xe ane'i miavuti la mikolinu vaikalau aloxo 'o, “Nexi talomusou vaikalasine vile molu ne Iutaia une'e uasi. Mo ta vivinge mose'i me'a ne Iutaia loxo lai ne ine'e sou ia'alomexi no anu mivile masua e nini ne'oxonu uasi. 22 gIa laixe lexe nexi talomusou xavutalamengi. Xo nexi telavusou lexe ta mitema ukalusi i'oxo lexe anu masua noxi'a ta mitema la'oluxa'a alavua ne Iutaia.”
23Aloxo ne, la sou ane'i me'a misosovosou voxosi'a sou utotomu no kakao ulai uxali no 'olovoxo ne ane'i tavu'alo milai mine'e noxou Paulo no tani sou anu mulamanalixa'a no anu 'ilixo sou saxisaxila'u noxou Lataua, mo anu mumasaxa lexe mulapune'i ine'e noxou Iesu no anu vaivaikala muxolu no anu lapuloto noxou Mosesi xe lavuku noxi'a ta mitema sou palomatana. 24La sou se'i noxi'a ne mimuxaxu tane'i no anu a'alo noxou xe se'i ne imuxaxu tane'i uasi. 25Aloxo ne la sou ane'i miavuti sou mi'otosou anaxa'a mo imulaxu xavutalai'a vilesisi uasi mo mi'ume milivu. La sou Paulo muvikalane'i no anu vaikala vile aloxo 'o, “Uleenu Tavuna muxolu noxou itema sou palomatana Aisaia la muvikalane'i ta xaixasinge no anu vaikala manina vile aloxo 'o,
26 h ‘Nalai noxi'a ta mitema ane ne, mo navikalane'i lexe
mii e ilolomusou ne umomomo sou ilavusou uasi.
Mo mii e imaisou ne umomomo sou itongonu uasi.
27Xo ta mitema ne mitatusou opone'i
mo sangali'a kalumo ne mutomutomu
xe ie'i ne seleveenu mukalu la imalei uasi.
Loxo 'o io ie'i laixe xe imalei mo sangali'a laixe sou ilomusou vaikala
xe ilavusou vaikala laaxu la ixiunu opone'i la sou eni apamauline'i.’
28Aloxo ne la sou, eni amasaxainge sou lexe ngalavusou lexe vaikala ane Lataua upamaulinenge la Anu mulosi'a ta mitema ane'i ane ta Iutaia uasi la ane'i ilomusou.” 29 ▼
30Xe no mine anu muxolu tauu lele'e ta tamei lai ne, la muxolu no anu taasou vile e sou ulolotonu utotomu. La anu mu'osasi sou umasaxai'a lexe ane'i ine'e no tani noxou. 31Xe anu muavuti la muvikalane'i mo u'ume uasi. Anu mua'aloi'a no anu saxisaxila'u noxou Lataua mo mulosi'eixu lavulavu sou Tila Iesu Kalisito mo itema vile sou utaluxu uasi.
Copyright information for
ATA